Два гола постигна Горан Пандев за Галатасарај на синоќешниот меч со Манисаспор, со што дојде до бројката седум погодоци во националниот Куп на Турција. Она што е најважно, Пандев ќе има можност да го зголеми тој скор со оглед дека има реванш, а потоа следува и полуфинале. Македонецот секаде каде што одеше освојуваше куп трофеј, па има шанси и во Галатасарај.
Пандев најпрво погоди во 68. минута, а 20 минути подоцна одново стрелаше за 3:0 и 4:0 со што стави печат на победата. И двата гола беа со глава. Триумфот на Галата можеше да биде поголем, ама Чолак откако даде еден пенал, утна втор и со тоа беше спречена вистинска катастрофа за гостите. Сега на реваншот Пандев ќе има можност за уште некој гол, а потоа и полуфинале со победникот од дуелот Кајзериспор и Сиваспор.