Ден по одлуката Љубинко Друловиќ да биде селектор на Македонија или четврти странец кој седнал на нашата клупа, Македонски спорт во акција за да ја дознае вистината и причините поради кои изборот падна на овој стратег. А беа понудени Раевац, Ѕола, Пенев, Стојановиќ... Улогата на преговарач ја имаше претседателот на ФФМ, Илчо Ѓоргиоски, кој имал средби во четири очи само со Пенев и Друловиќ, а со Раевац и другите имал постојана комуникација преку телефон.
На денот на одлуката и состанокот на УО на ФФМ во Велес е одлучено довербата да ја добие Љубинко Друловиќ. Но, зошто!?
Според она што го дознавме, Друловиќ немал некои екстра барања. Единствено на што инсистирал стратегот од Србија е тоа негова десна рака да биде Луис Диого Кампос. Негов пријател од Португалија кој работи како тренер и кој треба да му биде помошник. А тој ќе биде платен само на повик како и фудбалерите. Што се однесува до финансиите, тие се исти како и оние кои ФФМ му ги даваа на Бошко Ѓуровски. Месечната плата ќе биде 7.000 евра, платен апартман во Скопје и трошоци за патувањата со Србија и до одредени сегашни или потенцијални репрезентативци. Тоа е в ред, тука нема ништо спорно.