Јувентус синоќа на Олимпико стадионот во Рим го освои трофејот во Купот на Италија откако со 2-1 го порази тимот на Лацио.
Алесандро Матри во судиското продолжение погоди за конечниот резултат 2-1, откако претходно Стефан Раду и Џорџо Киелини погодија за резултат 1-1 во регуларните 90 минути од натпреварот.
Тоа беше вкупно 10-ти трофеј во Купот на Италија за „Старата дама“, а прв по пауза од 20 години. Јувентус веќе го освои трофејот и во италијанската Серија А, а на 6-ти јуни италијанскиот шампион го очекува финалниот натпревар од ЛШ против Барселона.
И токму Барселона на официјалниот Twitter профил му ја честиташе титулата на Јувентус и тоа на италијански јазик.
- “Барселона му честита на Јувентус за освојувањето на Купот на Италија. Браво, Јуве, ќе се видиме во Берлин”, стоеше на Twitter профилот.
Барселона на 30-ти мај на Ноу Камп ќе се обиде да го освои Копа дел Реј трофејот. Таму Каталонците ќе си ги одмерат силите со тимот на Атлетик Билбао.