Доколку АБА-лигата преживее, МЗТ Скопје повторно ќе биде дел од неа. Македонскиот шампион потешко од очекувањата го доби клучниот меч со Тајфун совладувајќи го со 77:70.
МЗТ Скопје добро го отвори мечот, по трите поени на гостите врати со серија од 10-0. Македонскиот тим имаше пристојно водство до пред крајот на првата четвртина (21:16), период кога Тајфун ја најави својата серија од 10-0 и поведе со 21:26, а потоа за кратко време поточно во 14. минута дојде до првата двоцифрена предност од 23:33. Во 18. минута таа изнесуваше и плус 12 (31:43). За избраниците на Александар Јончевски во првото полувреме голем проблем беа скоковите, имаа вкупно десет скока наспроти 25 на гостинскиот тим.
По негативата од осум поени по првите 20. минути, кошаркарите на МЗТ Скопје се консолидира. Младиот Марко Луковоќ, заедно со Ѓорѓе Дреновац беа главните „виновници“ што македонскиот тим успеа да се врати резултатски, а на крајот на третата четвртина да поведе со 61:59.
Во продолжение „сино-белите“ го зголемија водството на пет минути до крајот имаа 68:60, но тоа не беше доволно. Тајфун на две минути до крајот се доближи на 70:67 и имаше шанса да изедначи, но не ја искористи. Дреновац од линијата за слободни фрлања и Луковиќ зголемија на 74:67,а печат на средбата стави Стојановски.
Марко Луковиќ со 19 поени беше најефикасен кај МЗТ Скопје, зад него беа Дреновац со 15 и Урош Луковиќ и Стојановски со по 14 поени.