Раководството на АБА-лигата одреди парична казна од 12.000 евра за Карпош соколи откако претседателот на клубот, Огнен Дедиќ, со своите изјави во јавноста „му наштетил на угледот на АБА-лигата и на спонзорите“. За клубот кој во минатата сезона успешно ја претставуваше Македонија во регионалната лига, се најавува и друга дополнителна казна, во вид на суспензија, со што му ја затвораат својата врата.
„Поради тежината на прекршокот, АБА-лигата, по препорака на Претседателството, ќе им предложи на клубовите можна повеќегодишна суспензија на Карпош соколи на сите натпреварувања во организација на АБА-лигата“, пишува во соопштението на АБА.
Не е прецизирано како ќе биде наплатена казната од К. соколи ако се знае дека клубот веќе не е дел од лигата и нема да учествува во неа во следната сезона.
По добиената покана за учество во втората јадранска лига, „соколите“ се почувствуваа навредени и измамени, сметаат дека местото им е во елитната АБА и ги разоткрија нечистите игри што ги играле кон нив дел од раководните луѓе во лигата.
По објавувањето на информацијата за чудната казна, дел од коментарите во српските медиуми се дека случајов личи: „Фаќаш некого како краде, го пријавуваш и на крај, ти одиш во затвор“.