Турнирот, односно дополнителните олимписки квалификации ќе стартуваат на 2 јули, а ќе трае до 8 јули 2012 година. Двајцата финалисти и победникот во мечот за третото место, заминуваат на Олимписките игри кои почнуваат на 28 јули
Како до Лондон 2012?Тоа е прашањето на кое треба да го дадеме следниот одговор. Откако успешно, дури и повеќе од тоа Македонија го одработи проектот "Литванија" и иако сe уште сме во фаза на славење на историското четврто место на Евробаскетот, сепак треба, мора да гледаме напред.
А тоа нешто се вика настапот на дополнителните олимписки квалификации за кои се изборивме со ова неверојатно остварување на ЕП во Литванија.
Бо и Сандро ќе бидат "тука" И пред да си заминат во Сиена, односно во Болоња, Лестер Бо Мек Кејлеб и Сандро Бенкардино, дале позитивен одговор околу нивниот понатамошен ангажман поврзан со играњето и работењето во нашиот национален тим.
Потврда за тоа доаѓа и лично од спортскиот директор на националниот тим, Врбица Стефанов
-Може да ви гарантирам дека Бо и Сандро и в година ќе бидат дел од репрезентацијата. Ако нема нешто непредвидено, тие сигурно доаѓаат за квалификациите за ЛОИ. Покрај тоа, Монтепаски е отворен за соработка во секое време. Тие ми кажаа дека што и да ни биде потребно, од играчи, тренери и сe преостанато, ни стојат на располагање, тврди Стефанов.