Екипата на МЗТ Скопје нема да патува за Софија, ниту, пак, да ги игра одамна закажаните натпревари со екипите на Панатинаикос и на Левски.
На ден пред тргнувањето кон бугарската престолнина раководството на клубот од "Јане Сандански" дека во овој момент тоа е најдобрата опција.
"За жал, МЗТ Скопје мора да го откаже ова гостување во Софија" - потврдува и претседателот на "сино-белите" од Аеродром, Сашо Босилков. "Имавме заеднички состанок во клубот на кој процениме дека во овој момент е најдобро да не ги играме веќе закажаните натпревари, за што веќе ги информиравме и двата клуба со кои требаше да се сретнеме во Софија"- дополнува Босилков.
Не е тајна дека оваа одлука е заснована пред се на безбедносни причини.
Имено, заедно со официјалната делегација на МЗТ Скопје, за Софија беше (ис)планиран и мини-караван од неколку автобуси со навивачи на "металците".
Освен тоа, клубот добил и полициска сугестија дека во овој момент не е премногу паметно да има навивачи на натпревар во кој ќе се сретнат екипи од Македонија и од нашиот јужен сосед, макар истата би ја претставувал и актуелниот европски шампион, Панатинаикос.
"Навистина искрено жалиме што доаѓа до една ваква ситуација. Но за нас во овој момент е речиси неизводливо да играме со Панатинаикос, од повеќе причини. Колку и да сакаме да побегнеме, не можеме. Не можеме да се бориме и со оние политички моменти кои со себе ги носи еден ваков натпревар. Во овие три недели наназад имавме обемна комуникација во и околу овој натпревар. Направивме апсолутно се што е до нас. Но по се, особено не сега, такво нешто не ни е воопшто потребно. Тоа е ставот на клубот, и мора да се почитува. Свесни сме за последиците, ќе ги прифатиме како такви. Едноставно кажано, подобро е да се спречи отколку да се лечи. Се надевам дека МЗТ Скопје ќе има друга шанса да ги одмери силите со Панатинаикос. Но не в четврток попладне во Софија, како што беше договорено, туку во некој друг термин, и место "- додава Босилков.