Со одигрувањето на натпреварите од квалификациите кои на програмата се вечерва стартува новата сезона во Евролигата. Победниците од групите во Вилнус (Литванија) и во Шарлроа (Белгија) ќе ги пополнат последните две места, додека останатите 14 екипи ќе продолжат во Еврокупот.
На овие натпревари и Македонија ќе има свој претставник, бидејќи во новата сезона во редовите на литванската екипа Литвос Ритас ќе настапува и македонскиот репрезентативец Предраг Самарџиски.
Четвртфинални натпревари кои вечерва се играат во Вилнус: Цибона - Шоле (почеток 17 часот) и Литвос Ритас - Будуќност (19:45 часот).
Утре на програмата се дуелите: ПАОК - Галатасарај и Асвел - Гравелин.
Четвртфинални натпревари во Шарлроа: Алба - Рига (18 часот) и Шарлроа - Доњецк (20:45 часот).
Утре играат: Химки - Туров и Нимбурк - Банвит.
Победниците во сабота ќе играат во полуфиналето, а в недела се играат финалните натпревари и само победниците на турнирите ќе се пласираат во Евролигата.