Кошаркарскиот клуб МЗТ Скопје Аеродром денеска и утре ќе биде организатор на турнир по повод 45 години од неговото формирање. На турнирот во салата „Јане Сандански“ покрај домаќинот ќе учествуваат и екипите на Кожув, Куманово и Торус СЦБТ.
Според распоредот денеска ќе се одиграат полуфиналните дуели, двојките се: МЗТ Скопје - Кожув (почеток 17 часот) и Куманово - Торус СЦБТ (почеток 19:30 часот).
Натпреварот за трето место меѓу поразените од денешните средби ќе се одигра утре од 14 часот и 30 минути, додека финалето е утре од 17 часот.
Управата на клубот од Аеродром на кошаркарите, тренерите и други спортски работници кои биле дел од МЗТ Скопје во изминативе 45 години и кои придонеле за неговиот развој и успешни резултати ќе им додели признанија на утрешната церемонија која ќе се одржи на полувремето од финалниот натпревар.