Во кошаркарската Суперлига вечер на програмата се закажани два натпревари од 6.коло. Во првиот од нив ќе играат лутите ривали МЗТ Скопје Аеродром и Работнички. Вечното дерби ќе се одигра во „Јане Сандански“ со почеток од 18 часот и 30 минути.
Работнички ги загуби шансите за влез во плеј-офот и овој дуел за него нема големо резултатско значење, додека за „аеродромци“ победа ќе значи сигурно останување на првата позиција барем до следното коло.
Шампионот Фени Индустри во Кавадарци ќе го пречека Куманово од 19 часот во вториот вечерашен натпревар од ова коло. Два бода за Фени ќе значи задржување на шансите за освојување на првата позиција, а со евентуален триумф „кумановци“ ќе останат со теоретските шанси за учество во плеј-офот.
Последниот натпревар од 6.коло ќе се одигра утре во Сарај (почеток 18:30), а во него Лирија ќе биде домаќин на Торус Спортски Центар Борис Трајковски.
Табела: МЗТ Скопје Аеродром 38 бодови, Фени Индустри 38, Торус СЦБТ 35, Лирија 34, Куманово 30 и Работнички 28.