Кошаркарите на Фени Индустри без одигрување на натпреварот со Зрински обезбедија пласман во четвртфиналето на БИБЛ лигата и ја задржаа можноста да ја одбранат титулата во ова натпреварување.
Кавадарчани денеска требаше да го одиграат одложениот натпревар со екипата на Зрински од Мостар, но бидејќи гостите не допатуваа во Кавадарци натпреварот е регистриран со службен резултат од 20:0 за Фени Индустри. Во образложението на раководството на тимот од Мостар, е наведено дека по завршувањето на лигата во Босна и Херцеговина го распуштиле тимот и немале доволен број играчи. Инаку, во меѓувреме Зрински го загуби и прволигашкиот статус во лигата на БиХ.
По ваквиот расплет тимот на тренерот Емил Рајковиќ доби ден повеќе за одмор во пресрет на куп завршницата на Македонија, која од четврток до недела ќе се одржи во Скопје. Првиот натпревар од четвртфиналето на БИБЛ, Фени Индустри ќе го одигра во Кавадарци на 28.март против екипата на Морнар од Бар. Реваншот и евентуалната мајсторка планирани се да се одиграат на теренот на противникот на 3.април и на 5.април.