МЗТ Скопје Аеродром е новиот кошаркарски шампион

Две децении МЗТ Скопје Аеродром ја чекаше шампионската титула која синоќа со победата над Фени Индустри во Кавадарци од 81:73 конечно беше освоена. „Аеродромци“ со вкупни 4:1 во победи го освоија шампионскиот пехар.

Последниот натпревар кој се одигра пред празните трибини во салата „Јасмин“, за гостите од Скопје почна лошо. Фени на самиот почеток направи убедлива предност 17:2, но МЗТ се врати во игра по неколку реализирани тројки. Во втората четвртина новиот шампион направи серија од 15:0 и навести дека титулата од Кавадарци ќе се пресели во Скопје. На полувреме гостинскиот тим замина со предност од 43:36, која ја одржуваше во второто полувреме.

Најефикасни во победничкиот тим беа Игор Мијајловиќ со 21 поен, Тони Грнчаров даде 15, Тодор Гечевски 14. Кај Фени Индустри Дарко Соколов со 17 и Кирил Николовски со 12 беа играчите со најмногу постигнати поени.

Големото славје на навивачи на МЗТ Скопје кои натпреварот го следеа на видео-бим во ТЦ „Бисер“ траеше до раните утрински часови, а половина час по полноќ ним им се приклучија и градоначалникот на Аеродром Ивица Коневски и кошаркарите кои во населбата „Јане Сандански“ пристигнаа со панорамски автобус.

МЗТ Скопје Аеродром стана петта екипа во македонскиот кошаркарски шампионат која успеала да биде шампион. Претходно титули освојувале Работнички (14), Никол Ферт (1), Струмица (1) и Фени Индустри (3).