Кошаркарската репрезентација на Македонија ноќеска го победи комбинираниот универзитетски состав од Атланта со 97:87. Ова беше втор дуел на македонската репрезентација која се наоѓа на турнеја на американскиот континент со универзитетскиот состав од Атланта. Во првиот натпревар одигран пред два дена победија домаќините со 81:79.
Тодор Гечевски со 22 поени повторно беше најефикасен во нашиот состав, а според реализацијата се истакнаа и Дамјан Стојановски со 15 поени, Предраг Самарџиски со 14, како и Перо Антиќ, Ѓорѓи Чековски и Војдан Стојановски кои завршија со по 10 постигнати поени.
Репрезентацијата синоќа се комплетираше со приклучувањето на Лестер Бо Мекејлеб, кој иако не настапи на мечот против универзитетскиот тим, ќе биде на располагање на селекторот Марјан Лазовски за претстојните пријателски натпревари во Порторико.
- Кажав и пред заминувањето дека резултатите од овие натпревари ни се во втор план. Тука сме за воигрување, одржување и подигнување на формата и секако за аклиматизација и привикнување на условите кои се различни од европските. Целата е тимот од ден на ден да изгледа се подобро и ќе продолжиме во тој ритам и во Порторико, изјави Лазовски за веб страната на Македонската кошаркарска федерација.
Репрезентацијата на Македонија денеска заминува за Порторико каде в среда и четврток ќе ги одигра двата последни пријателски натпревари од подготовките против домашната репрезентација. Веднаш по нивното завршување, македонските репрезентативци ќе заминат во Каракас (Венецуела) на предолимпискиот турнир.