Кошаркарската репрезентација на Македонија вечерва во 2 часот по полноќ ќе го одигра првиот натпревар против домашната репрезентација на Порторико, кој воедно е и претпоследен од подготовките за настап на предолимпискиот турнир.
За овој дуел селекторот Марјан Лазовски, првпат во подготвителниот период на располагање ќе ги има сите 12 планирани кошаркари за предолимпискиот турнир, вклучително и Лестер Бо Мекејлеб, кој се приклучи на тимот на подготовките во Атланта.
Натпреварот Порторико - Македонија ќе се одигра „Колисео“ арената во Сан Хуан, која беше и меѓу кандидатите за организација на Олимписките игри во 2004 година и лани беше вклучена во „Топ 50-те светски арени“.
Пред два дена Порторико во оваа арена загуби од Доминиканска Република во финалето од Центробаскетот, а како и Македонија, така и домашната репрезентација вечер и утревечер ги игра последните два подготвителни натпревари пред стартот на турнирот во Каракас, Венецуела.