Марјан Лазовски кој осум години беше дел од стручниот штаб на македонската кошаркарска репрезентација, а како селектор работеше последните осум месеци како клучна причина за поднесената оставка го наведе неуспехот на олимписките квалификации во Венецуела кога Македонија не успеа да избори пласман на ЛОИ во Лондон.
- Тоа што не отидовме во Лондон беше основниот мотив да се повлечам од селекторското место. Но овој потег освен од морални го направив и од здравствени причини, како и од желбата целосно да се посветам на клубот во кој работам, изјави Лазовски.
Управниот Одбор на МКФ имаше разбирање за ваквиот потег и на вчерашната седница ја прифати оставката на Лазовски, но најави негово натамошно вклучување во други проекти на МКФ.
Од Федерацијата најавуваат дека во наредниот период, спортскиот директор Врбица Стефанов и директорот на репрезентациите Илија Мерџановски, активно ќе се вклучат во процес на изнаоѓање ново решение за македонскиот најдобар кошаркарски тим. На состанокот на УО беше потенцирано дека внимателно ќе се избира и нема да се избрзува, со надеж дека Македонија ќе го добие новиот селектор до извлекувањето на групите за Евробаскетот во Словенија 2013, закажано за 18 ноември.