Македонскиот кошаркарски шампион МЗТ Скопје го претстави вжновиот тренер Словенецот Алеш Пипан, кој на жешката клупа го наследи Александар Тодоров. Тој на денешната прес-конференција се заблагодари на раководството на македонскиот тим и истакна дека е подготвен за големиот предизвик што го носи работата со тимот од Јане Сандански.
- Би сакал да им се заблагодарам на управата на клубот што ме избраа мене за тренер. Ми претставува чест да бидам тренер на овој клуб, но свесен сум и за одговорноста што ја носи оваа функција. Можам да ветам дека ќе дадам се од себе за сите во клубот да бидат задоволни. Првите впечатоци ми се одлични, ова е организиран клуб, со фантастични навивачи и верувам дека со мали промени можеме да направиме резултат со кои сите ќе бидеме задоволни, изјави Пипан.
Словенецот, истакна и дека во прво време нема намера да влече било какви потези и да менува дел од кошаркарите.
-Рано е да се прават промени, треба прво да се согледа ситуацијата, е потоа и да се повлечат конкретни потези. Вчера го одржав првиот тренинг, можам да кажам дека момците се добро подготвени, се гледа дека и претходно имаа квалитетен тренер.
Дел од играчите ги знам, другите ќе ги запознаам наскоро, по што далеку подобро ќе може да се постават темелите на играта, додаде Пипан.