Со поддршка од трибините и давање максимум на теренот, тимот МЗТ Скопје Аеродром вечерва (20.30 часот) во спортскиот центар „Борис Трајковски“ ќе се обиде да го совлада лидерот на АБА лигата, Игокеа.
Македонскиот шампион уште има шанси за освојување на едно од местата кои водат во Еврокупот, дури и за фајнал-фор, но надежите ќе си ги продолжи само со победа над претставникот на Босна и Херцеговина. По победата над Цедевита во минатото коло, во МЗТ владее позитивна атмосфера, вратена е самодовербата и на гостите нема да им биде лесно да ги освојат двата бода.
„Орка спорт“ нуди подарок за сите со купени билети
На македонскиот претставник нема да му биде лесно да дојде до целта, па затоа ќе му треба и голема поддршка од трибините. Во клубот го знаат тоа и затоа одлучија со еден купен билет во салата да можат да влезат две лица.
Покрај тоа, компанијата „Орка спорт“ нуди можност за подарок за сите љубители на кошарката кои ќе купат билет за вечерашниот меч. Од денеска до 1 март, подарокот може да се подигне во сите продавници на „Орка спорт“, ќе треба да се приложи купената влезница и сметка над 1.000 денари.