Македонскиот кошаркарски шампион МЗТ Скопје - Аеродром го претрпе третиот пораз во петиот натпревар во АБА лига. Избраниците на тренерот Влада Вукоичиќ, во неизвесен натпревар од првата до последната минута загубија од шампионот во ова натпреварување Партизан со 70:69. “Металците” имаа свои момент на натпреварот, а на стартот водеа и со осум поени разлика (10:2).
Голем хендикеп на овој натпревар за македонскиот шампион беше исклучувањето на центарот Тодор Гечевски во седмата минута. Тој остро реагираше на една сомнителна одлука на судијата,и наместо техничка грешка заработи исклучување.
Сепак металците имаа шанса за победа, бидејќи на неполни две минути до крајот имаа водство од четири поени 69:65, но не успеаја да го задржат до крајот . Стефан Синовец со 14 поени беше најефикасен во тимот на МЗТ , Оташевиќ постигна 13 , а Чековски натпреварот го заврши со 10 поени . Во таборот на Партизан ,Трејси Кинг, беше најефикасен со 24 поени.
Следниот натпревар МЗТ го игра во среда на гости кај турскиот Банвит, а во АБА лигата ќе игра во сабота против Мега Визура.