Новиот тренер на МЗТ Скопје Аеродром, Змаго Сагадин, од денеска до недела ќе одржува тренинзи со играчи од младите категории на клубот, а официјалниот почеток на подготовките е наредниот понеделник, на 11 август, кога треба да се приклучат оние сениори што не се репрезентативци.
Словенечкиот стручњак вчера пристигна во Скопје и една недела ќе работи со младите да види дали евентуално некој од нив би можел да биде вклучен во првата екипа.
Првите денови од подготовките ќе се тренира во малата сала на спортскиот центар „Борис Трајковски“, а по завршувањето на изградбата на СЦ “Јане Сандански“, подмладениот тим на МЗТ ќе се врати во својата населба. Новата сала во Аеродром е при крај, но уште не е поставен паркетот и некои други придружни работи, па за работа на спортските екипи во тој објект ќе треба да се почека уште некое време.
На 11 август ќе дојде Лучиќ, утре пристигнува Пајиќ, а тие заедно со Марковски, Николовски, Стајиќ, Маринковиќ и Цветковиќ ќе бидат сениори кои ќе му се стават на располагање на новиот тренер. Управата е во потрага по шести странец бидејќи не можат предолго да го чекаат одговорот од домашните играчи за кои има интерес кај „металците“. Но, вистинското комплетирање на тимот ќе се случи дури по завршувањето на квалификациите за ЕП кога треба да дојдат и репрезентативците (Костоски, Цинцадзе, и младите Младеновски и Арсоски). Практично, комплетниот состав на МЗТ треба да се види на 1 септември кога составот заминува на висински подготовки во Маврово.