Денешната средба (почеток 17 часот) против Хрватска во Загреб треба да покаже колку реновираната македонска машка репрезентација добро ги одработела подготовките за квалификациите за Европското првенство 2015 година. Ова е најсериозен подготвителен тест за момчињата на селекторот Александар Џикиќ бидејќи противникот е учесник на претстојното Светско првенство, но поназад е со подготовките од македонскиот тим и затоа „коцкестите“ не се непобедливи.
По шесте контроли на домашен терен, по три во Охрид и Скопје каде билансот беше 5-1, ова е прв и единствен пријателски меч на гостински терен. Нашите репрезентативци вчера отпатуваа за Загреб каде тренираа двапати пред дуелот со домаќините за кои ова е само трета контрола (двапати ја победија Канада, но во Славонски Брод), но тие допрва треба да влегуваат во форма бидејќи СП почнува на 30 август, а за Македонија првиот официјален меч е в недела, дома против Белгија.
Џикиќ на контролата во Загреб нема да смета на Дамјан Стојановски, кој има проблем со задната ложа и самостојно тренираше изминативе денови, а во составот го нема ниту Бојан Крстевски, кој одигра само еден пријателски меч, оној првиот во Охрид. Сепак, селекторот верува дека ќе бидат фит за 10 август и мечот со Белгија.
„Добро ќе беше да бевме комплетни, но Бојан и Дамјан, како и сите други ќе ни требаат здрави и 100 проценти спремни за средбата со Белгија. Не велам дека резултатот не е важен, добро би било да победиме во Загреб, но и пораз нема да биде катастрофа. Во прв план е да видиме како тимот се однесува на гости и колку добро сме подготвени на една недела пред стартот на квалификациите. Хрватска е посилна од нашите противници во квалификациите, мислам дека е противник по мерка за нас во оваа фаза“ - смета селекторот.
Џикиќ откако се одлучи да не ризикува со Стојановски и Крстевски, па за денешното гостување против Хрватска ќе смета на Ивица Димчевски, Андреј Магдевски, Дарко Соколов, Александар Костоски, Војдан Стојановски, Марко Симоновски, Владимир Брчков, Бојан Трајковски, Стојан Ѓуроски, Марјан Јанески, Ричард Хендрикс и Љубомир Младеновски.
Тимот се враќа дома веднаш по натпреварот, по што следува одмор, и продолжување на подготовките.
Завршната прес-конференција на која играчите и стручниот штаб ќе ги кажат своите очекувања за овој циклус е закажана за в петок. Првата средба од квалификациите се игра в недела, од 20:30 часот, а продажбата на билети почнува утре.
И хрватскиот селектор Јасмин Репеша е задоволен што неговиот тим ќе се сретне со тим како македонскиот. Хрватите вчера двапати тренираа во Загреб и денеска ќе се обидат да покажат дека ја подигнале формата во однос на мечевите со Канада.
„Мораме детално да ги анализираме дуелите со Канада, да видиме што беше добро, а што лошо, и преку тренинзи и дуелот со Македонија да се обидеме да ги поправиме. Против Македонија мора да одиграме подобро отколку против Канаѓаните“ - изјави Репеша.