Браќата Пау и Марк Гасол испишуваат нова страница во историјата на ол-стар натпреварите во НБА откако добија доволен број гласови да настапат во првата петорка на собирот на сите ѕвезди. Шпанците се првите браќа кои ќе заиграат во почетната петорка на ол-стар, инаку во 1970 и 1971 година браќата Том и Дик Ван Арсдејл настапија на ол-стар, но не како стартери.
Пау и Марк ќе играат еден против друг како главни центри на своите конференции. Постариот Пау како член на Чикаго булс ќе игра за Истокот, а Марк, кој го носи дресот на Мемфис гризлис, за Западот. За Пау Гасол ова ќе биде петти ол-стар, но прв како играч на Истокот бидејќи летоска замина во Булс, негов прв НБА тим од Истокот, откако претходно играше за Мемфис и ЛА Лејкерс.
„Тоа што ќе скокам против брат ми Пау при почетното потфрлање е големо достигнување за нашето семејство и момент на кој ќе се сеќавам до крајот на животот. Прекрасно е што ја добив довербата на навивачите да бидам претставник на мојот клуб, градот Мемфис и фановите на Гризлис низ светот“ - изјави Марк Гасол.
Инаку, најмногу гласови за настап на ол-старот во Њујорк на 15 февруари доби Стивен Кари од Голден стејт, надминувајќи го Леброн Џејмс, кој водеше по претходното пребројување на гласовите. Коби Брајант е изгласан од фановите, но повредата на рамото ќе го спречи да игра, па Западот ќе има друг бек шутер во првата петорка. Коби ќе остане на 17 учества на ол-старите, две помалку од рекордерот Карим Абдул Џабар.
Годинава навивачите решија да не гласаат за Двејн Вејд, Крис Бош, Кевин Дурант и Крис Пол кои во минатите години беа редовни стартери.
Тренер на Истокот ќе биде Мајк Баденхолцер од Атланта, а на клупата на Западот ќе седи Стив Кер од Голден стејт, кој сезонава е дебитант како главен тренер. Резервите ќе бидат објавени на 29 јануари.