Фелипе Маса ја прифатил понудата да остане во Формула 1 и следната година со тимот на Вилијамс, со што се исполнети сите предуслови Валтери Ботас да го замени пензионираниот шампион Нико Розберг во тимот на Мерцедес.
Иако финалните договори не се потпишани, „Аутоспорт“ потврдува дека Маса реши да продолжи уште една година, но само доколку Ботас навистина замине во Мерцедес.
Мерцедес најавија дека Ботас им е првата цел по шокантното пензионирање на Розберг, но Вилијамс ја отфрли првата понуда во која имаше и „попуст“ од 10 милиони евра за моторите кои англискиот тим ги добива од Мерцедес, како и јуниорскиот возач на германската компанија, Паскал Верлајн.
Вилијамс не сакаат ваква опција бидејќи Верлајн, кој има една сезона во Ф1 со тимот на Мејнор, би бил партнер со канадскиот дебитант, тинејџерот Ленс Строл во сезона во која има серија големи промени на правилата.
Мерцедес официјално ќе потврдат кој е замената за Розберг на почетокот на новата година, а не-извршниот директор Ники Лауда призна дека ситуациајта е „многу тешка“.