Новиот шеф на Формула 1, Чејс Кери, вели дека спортот може да воведе стандардни делови во обидот да се намалат трошоците за тимовите.
Буџетите на Ф1-тимовите се огромни, како 400 милиони евра на Ферари, но повеќето работат со помали буџети од стотина милиони евра. Барањето да се намалат трошоците не е ново, но, сепак, има многумина кои сметаат дека Формула 1 треба да биде на врвот на технолошкиот напредок, а не да се користат стандардни делови. Кери вели дека деловите би можеле да бидат стандардни без „заглупавување“ на Ф1.
„Има многу патеки да се стигне до целта, како ограничување на буџетот, но можеме и да работиме на клучните компоненти на болидот. Не сакаме стандарден болид, бидејќи ова е спорт кој претставува и натпреварување на технологиите. Сепак, може да се направат стандардни делови“, вели Кери.
Не е познато кои делови би можеле да се стандардизираат во Ф1, иако Рос Браун претходно најави дека има делови „кои не влијаат на шоуто и фановите не ја сфаќаат разликата“, како суспензијата. Кери открива дека разговарал со повеќе тимови за идејата и дека не е целта сите буџети да бидат исти.
„Еден од предизвиците е тоа што има малку тимови кои трошат многу повеќе од другите, и тоа се гледа преку резултатите на патеката. Ако можеме да ги донесеме трошоците на релативно еднакво ниво, тогаш ќе имаме поголема конкурентност. Почнавме со процесот, но има доста работа. Делови како моторот се многу важни за овој спорт и треба да се внимава“, додава Американецот.