Формула 1 тимот на Мерцедес објави дека лидерот во генерален пласман, Германецот Нико Розберг потпишал „повеќегодишно продолжување на договорот“.
Розберг, кој оваа сезона победи на три трки (Австралија, Монако и Австрија) и води пред тимскиот колега Луис Хамилтон со 4 поени, е во тимот на Мерцедес од 2010 година, откако ја започна кариерата со тимот со кој неговиот татко Кеке освои титула, Вилијамс.
„Горд сум што ја возам Формула 1 „Сребрената стрела“ во модерната ера. Како Германец, наследството и историјата на Мерцедес-Бенц е многу посебно за мене и почестен сум што ќе го претставувам брендот во светот. Во последната година имавме огромен прогрес, тимот беше засилен во секој поглед. Сигурен сум дека ќе победуваме на повеќе трки, и се надевам, ќе освојуваме титули“, вели Розберг.
Шефот на Мерцедес Моторспорт, Тото Волф е задоволен од продолжувањето на договорот.
„Брзината, посветеноста и фокусот на Нико ни помогнаа да добиеме вистински правец во развојот на тимот. Тој е еден од најдобрите возачи во Формула 1“, објаснува Волф.
Според германскиот дневен весник „Билд“, новиот договор на Розберг, кој доаѓа по свадбата со неговата долгогодишна девојка Вивијан, е на три години и севкупно вреди 55 милиони евра.