Шефот на Мерцедес Моторспорт, Тото Волф, потврди дека неговиот тим нема да зборува со други возачи сè додека не добијат одлука од Луис Хамилтон за неговата иднина по 2015.
Договорот на Британецот завршува на крајот на следната сезона, меѓутоа со тимот се согласија дека ќе ги одложат преговорите сè до одлучување на борбата за титулата. Дури ако не успеат да склучат договор, Мерцедес ќе почне да разговара со други возачи.
Хамилтон има 17 поени предност пред Нико Розберг на три трки пред крајот на сезоната, која продолжува овој викенд со Американското ГП во Тексас.
„Имаме договор со двајцата возачи за 2015 година. Сакаме да продолжиме со сегашниот состав бидејќи овие момци се дел од успехот на тимот. Тие се познаваат многу одамна и целосно се почитуваат. Моментот кога ќе вклучиме некој друг во битката, ќе страдаат перформансите. Затоа сакаме да останеме со нив и по 2015“, објаснува Австриецот.
Односите помеѓу Хамилтон и Розберг имаа своја „точка на топење“ во текот на летото откако Британецот го обвини Германецот дека намерно се удрил во него на Белгиското ГП во Спа. По преговорите во тимот ситуацијата се смири и Хамилтон стигна до четири победи во низа за да ја преземе контролата во шампионатот.
Фернандо Алонсо наводно ги известил Мерцедес дека е подготвен да го замени Хамилтон за 2016 доколку не успеат да го продолжат договорот. Се верува дека овој договор ја има поддршката и од Берни Еклстоун. Волф вели дека не чувствува никаков притисок.
„Не постои такво нешто. Една од причините за нашиот прогрес е тоа што сме Мерцедес-Бенц и имаме голема поддршка. Тие нè оставаат да си ја тераме работата и да ги носиме вистинските одлуки. Секако, бордот ги носи одлуките, но нема притисок“, вели Волф.