Хрватска ја совлада Шпанија со 2:1 во интересен меч, за да го обезбеди првото место во својата група со две победи и едно реми, додека Турците успеаја со 2:0 да ги пратат Чесите на последното место.
После долга серија на успешни резултати Шпанците претрпеа пораз од селекцијата која посакуваше реванш за дуелот во Гдањск пред четири години.
Селекцијата на Хрватска имаше одличен финиш на средбата против Шпанија и дојде до голема победа од 2:1 со што се најде на првата позиција во групата Д. „Фуријата“ беше голем фаворит, но не успеа да издржи до крај така што на крајот мораше да се помири со пораз и преселба во делот од осминафиналниот костур во кој се посилните репрезентации.
Шпанија поведе рано, но прими гол во последната минута од првото полувреме. Тоа беше првиот шок, но овој резултат и понатаму беше позитивен за Европскиот првак.
Доколку Серхио Рамос го реализираше пеналот во 72. минута работите ќе беа далеку подобри за Шпанците и сигурно и ќе победеа. Вака ги стигна казната и тоа преку Перишиќ кој постигна гол за победа во 87. минута од натпреварот и стави точка на овој дуел.
ХРВАТСКА - ШПАНИЈА 2:1
Калиниќ 45’, Перишиќ 87’ - Мората 7’