Италијанскиот првак Јувентус уште го нема создадено комплетниот тим за новата сезона. Според најавите, дресот на „Старата дама“ во многу брзо време ќе го облече Блаис Матуиди. Францускиот репрезентативец кој е член на екипата на Пари Сен Жермен, се согласил да ја смени средината и од редовите на францускиот шампион, да се пресели во најдобриот тим во Италија.
ДОАЃА ЗА СУМА ОД 30 МИЛИОНИ ЕВРА
Јувентус веќе подолго време настојува да го доведе францускиот репрезентативец, но проблем беа парите. „Старата дама“ нудеше 25 милиони евра, а ПСЖ не сакаше да го продаде за помалку од 40 милиони евра. На крајот двете страни, најверојатно, се договорија за трансфер вреден 30 милиони евра, плус четири милиони кои треба да бидат исплатени во вид на разни бонуси.
НА МЕСТОТО НА ЕДЕН ФРАНЦУЗИН ДОАЃА ДРУГ ФРАНЦУЗИН
Еден од највлијателните менаџери во светскиот фудбал, Мино Раиола одигра значајна улога во овој трансфер. Раиола го продаде Пол Погба од Јувентус во Манчестер Јунајтед, а тогаш на италијанскиот првак му спомнал дека може да го доведе Матуиди од ПСЖ. Гигантот од Торино мора да најде соодветна замена за Погба, а се чини дека Матуиди ќе биде идеално решение.
Самиот играч веднаш се согласил да се пресели во Јувентус бидејќи му била понудена плата слична како таа што ја добивал кај „светците“. Тој е еден од најплатените играчи во Франција со годишна плата од девет милиони евра.
До крајот на преодниот рок останува само уште една недела, но се очекува трансферот да биде завршен многу побрзо и Матуиди да биде дел од италијанската Серија А. Освен за ПСЖ, тој има играно и за Троја и Сент Етјен. Во дресот на „галските петли“ има 50 меча во кои постигнал осум погодоци.