Дисциплинска комисија при Европската фудбалска асоцијација (УЕФА) ќе одлучува за казните околу
случувањата на натпреварот Италија - Србија по добивањето на официјалниот извештај од делегатот на мечот Давид Петриашвили. Грузискиот делегат подготвил сеопфатен извештај и по неговото поднесување во Куќата на фудбалот во Нион, според информациите во медиумите во Италија се очекува натпреварот да биде регистриран со службен резултат од 3:0 за италијанската репрезентација.
Таквата одлука се очекува УЕФА да ја донесе на првото следно заседание кое е закажано за 28 овој месец во Нион, Швајцарија.
Неизвесно е дали ќе и се дозволи на Србија да ги продолжи квалификациите, а со казна се соочува и Италијанската фудбалска федерација поради слаба организација.
Инаку натпреварот во Џенова меѓу Италија и Србија требаше да се игра во рамките од „Ц“ квалификациската група за Европското првенство 2012 година во Полска и Украина. Поради дивеењето на српските хулигани кои фрлаа разни предмети и пиротехнички средства во теренот, истиот беше прекинат во седмата минута кога судијата одлучи дека не е безбедно за играчите да се одигра под такви околности.