Деца ќе бидат единствените навивачи на трибините на повторениот натпревар помеѓу Ајакс и Аз Алкмар од осминафиналето на холандскиот куп во фудбал, соопшти фудбалската федерација на Холандија. Оваа одлука е последица на инцидентот кој се случи на натпреварот помеѓу овие два тима на 21 декември 2011 година, кога хулиган се обиде да го нападне голманот на Аз Алкмар, Естебан Алварадо.
Повторениот натпревар ќе се одигра на 19 јануари и ќе биде од едукативен карактер. Децата кои ќе го следат натпреварот ќе бидат на возраст до 12 години. Првичната одлука на фудбалската федерација беше натпреварот да се одигра на празни трибини, за подоцна да дозволи исклучиво деца да бидат навивачи.
Судот во Холандија минатата година го осуди хулиганот идентификуван како Весли ван дер В. на шест месеци затвор, а доби и обврска во период од две години да се јавува во полициска станица во текот на сите натпревари на Аз и Ајакс.