Швајцарскиот производител на часовници „Таг Хојер“ објави дека ќе заврши со своето долгогодишно партнерство со тимот на Мекларен и од следната година ќе биде спонзор на Ред Бул Рејсинг.
Зачудувачката одлука ја објави шефот на компанијата, Жан-Клод Бивер. „Таг Хојер“ е најстариот партнер на Мекларен, бидејќи двете компании оваа година прославија 30-годишнина од почетокот на соработката.
„Да, од следната година имаме договор со Ред Бул Рејсинг. Се работи за млад и динамичен тим, кој совршено се вклопува во стратегијата на ТАГ Хојер“, изјави Бивер.
„Таг Хојер“ е во сопственост на ТАГ групацијата, која поседува дури 25 отсто од Мекларен групацијата, матичната компанија на Мекларен. Тимот од Вокинг има неславна сезона, откако почетоците на соработката со Хонда беа одбележани со откажувања на моторите и големо заостанување зад големите тимови. Мекларен е само деветти во генерален пласман, и зад нив се само Мејнор-Марусја.
„Партнерството на Мекларен со Таг Хојер беше едно од најуспешните и најдолгорочните спонзорства во историјата на спортот. Тоа траеше 30 години, период во кој двете страни заедно стигнаа до големи успеси. Им благодариме за долгото партнерство и за добро завршената работа“, изјави портпаролот на Мекларен.