Ред Бул признаваат дека најдобрата шанса за нова победа оваа година под нормални услови веќе е зад нив по Сингапур ГП трката, но додаваат дека сè уште може да има можности за победа доколку се случи нешто непредвидливо на последните шест трки од сезоната.
Даниел Рикијардо беше многу блиску до победа на Сингапур ГП трката откако во финишот на трката на нови гуми бргу ја намалуваше предноста на Нико Розберг во Мерцедес, но на крајот таа остана на половина секунда.
Патеката „Марина беј“ требаше да биде најдобра шанса за Ред Бул да додадат на деби-победата на Макс Ферстапен на Шпанското ГП во мај, но иако го помина Луис Хамилтон, Рикијардо не можеше против Розберг, кој имаше совршена трка.
На календарот остануваат патеките како Сепанг и Сузука, каде што е потребна голема надолна сила, еден од адутите на Ред Бул, но тие патеки имаат и многу рамни делови, на кои Мерцедес доминира. Токму затоа шефот на тимот, Кристијан Хорнер признава дека ќе биде потребно нешто посебно и неочекувано за победа пред „Сребрената стрела“.
„Бевме навистина блиску во Сингапур. Само половина секунда ни недостасуваше за да победевме еден Мерцедес во фер-битка. Се надевам дека ќе имаме вакви шанси во следните шест трки, но Мерцедес се толку силни на сите тие патеки. Ќе мораме да чекаме нешто поинаку, како временски услови, деградација на гумите или слично“, вели Хорнер.
Англичанецот исто така инсистираше дека не постоеја тимски наредби на трката во Сингапур за интересниот дуел меѓу Данил Квјат и Макс Ферстапен, откако Холанѓанецот го смени Русинот на почетокот на сезоната. Квјат имаше еден од најдобрите викенди по враќањето во Торо Росо и успеа да го задржи Ферстапен зад него, иако преку радиото му беше порачано дека се бори со Фернандо Алонсо во Мекларен за позиција.
„Тоа не беше кодирано за тимска порака. Тие се тркаа за позиција. Поените за Торо Росо се исто толку вредни како и за нас и се сомневам дека Квјат би нè послушал нас. Тоа беше добро тркање меѓу двајца возачи. Се бореа за свои поени. Дени беше цврст, но фер и немавме никаков проблем со тоа“, изјави Хорнер.