Денес пристигнуваат Европските шампиони, ракометарите на Вардар! Цела Македонија ги чека токму нив за да прославиме заедно за титулата. Сите сакаат да ги бодрат и да ги поздрават, па денес двете места на кои треба да се најдете се аеродромот „Александар Велики“ или плоштад „Македонија“.
Ракометарите во 11 часот пристигнуваат на аеродромот, каде што ќе ги пречека група граѓани. Има организирано бесплратен превоз со автобусите на ЈСП, кои тргнуваат од три места во 09:30 часот и тоа од населба Ѓорче Петров, Кисела Вода и Аеродром. Од аеродромот, ракометарите ќе се упатат кон Скопје, односно кон булевар „Александар Македонски“, булевар „Гоце Делчев“, кон зградата на МРТВ и ТЦ Мавровка. Оттаму ќе продолжат по булеварот „Крсте Петков Мисирков“, „Кочо Рацин“, па улица „11 Октомври“ за да се симнат пред порта „Македонија“.
Во 13 часот, тие ќе се упатат на плоштадот. На ова место веќе е поставена бина и се чекаат ракометарите да ги споделат најинтересните и највозбудливите моменти од нивните натпревари, особено од големото финале со ПСЖ.
Ајде шампиони, сите ве чекаме!