Баерн Минхен победи и во Торино и овој пат со резултат од 2:0. Со тоа само ја потврди својата доминација во дуелот со лидерот во Серија „А“. На тој начин Германија го доби и вториот полуфиналист, а самиот факт што Јуве не можеше да го совлада Нојер докажува дека Баерн оди сигурно кон нов голем успех.
Составот на Јувентус се обидуваше да го отвори резултатот на средбата и да биде првиот тим што ќе успее да постигне гол. Сепак, работите не одеа најдобро во првиот дел. Најсериозната шанса ја имаше Андреа Пирло од слободен удар, но неговиот удар беше одбранет од страна на Мануел Нојер кој беше на висина на задачата така што не се измени ништо во играта и сè остана како на почетокот.
До крајот на првото полувреме не се случи ништо посериозно пред голот на Нојер, но немаше ниту премногу работа за Буфон. Со тоа на одмор се замина со 0:0 и работите сè уште беа отворени.
Второто полувреме почна во ист стил и немаше измени во играта до 64 минута кога опасниот Манџукиќ успеа да го отвори резултатот со наоѓањето на патот до голот на Јувентус.
Со овој погодок стана јасно дека нема да има продолженија на овој меч, а воедно на екипата на Јувентус и беа потребни три гола за пат во полуфиналето.
Домашните тргнаа со сите сили во напад, но работите не одеа најдобро. Немаа доволно сили за да можат да го издржат налетот на Баерн, но немаа ниту расположени напаѓачи. Пред последниот свиреж примија уште еден гол. После акцијата на Швајнштајгер кој асистираше, Пизаро успеа да реализира за 2:0 и вкупно 4:0 за уште еден пласман во полуфиналето на „баварците“.