Фудбалерите на Атлетико Мадрид, исто како и нивниот градски ривал Реал, со победа на гостински терен се пласираа во финалето на Лигата на шампионите. „Јорганџиите“ синоќа во реванш полуфиналето во Лондон го совладаа Челзи со 3:1, доволно за конечен тримуф по нерешените 0:0 на првиот дуел.
Домаќините први дојдоа во водство преку Фернандо Торес во 36.минута. Пресвртот го најави Адријан пред крајот на првото полувреме (44.минута). Диего Коста од пенал (60) зголеми на 2:1, а победата за Атлетико ја потврди Арда Туран во 72.минута.
Реал Мадрид во вторникот го победи Баерн Минхен на негов терен со 4:0 и со вкупни 5:0 оди во финалето.
По овој исход од полуфиналните пресметки, во завршницата од елитното натпреварување за првпат ќе учествуваат два клуба од ист град. Реал Мадрид ќе се бори за јубилејната десетта шампионска титула, додека Атлетико Мадрид ќе игра за првиот наслов - европски првак.
Шпанското финале ќе се одигра во Лисабон, Португалија на 24 мај.