Ракометарите на Металург одиграа нерешено против Краснодар 27:27, во вториот натпревар на турнирот „Вардар 2015“ што се одржува во салата „Јане Сандански“ во Скопје.
Тимот од Автокоманда во финишот од натпреварот за неколку минути прокоцка пет гола предност. Во изедначеното прво полувреме двете екипи се сменуваа во водство, сепак со еден гол предност на одмор замина рускиот тим (11:12). Металург добро го почна второто полувреме и за девет минути игра направи серија од 6:1 и поведоа со 17:13 предност која ја одржуваа до крајот на мечот кога противникот со неколку голови во серија намали на 22:20.Во финишот Металург одново ја презеде контролата на теренот, сепак Русите повторно се вратија во игра, постигнаа неколку гола во серија и во истекот на последната минута успеаја да изедначат на конечните 27:27.
Најефикасни во составот на Металург беа Јанко Божовиќ со девет и Бојан Маџовски со седум гола.