Само еден ден откако Роџер Федерер објави дека ќе ги пропушти Олимписките игри во Рио поради тоа што не заздравил на време по операцијата на коленото, уште еден тенисер поради повреда може да го направи истото. Се работи за Рафаел Надал. Големата надеж на Шпанците за медал во Рио не е во форма бидејќи веќе два месеци неможе да заздрави од повреда на раката. Поради тој проблем се откажа од Ролан Гарос, а потоа се повлече од Вимблдон, а во вторникот го откажал тренингот со Енди Мареј во Мајорка и тренирал самостојно на тврда подлога. Надал уште не ја санирал повредата и тоа ја загрижува шпанската јавност.
ВЕСЕЛИ СЕ ОТКАЖА
Најдобриот чешки тенисер Јири Весели кој е 49 на АТП листата, објави дека нема да учествува на тенискиот турнир на Олимписките игри во Рио поради проблеми со грлото. Тој веќе две седмици пие антибиотици и се обидува да излекува инфекција на грлото.
Весели им се приклучи на сонародниците Томас Бердих и Каролина Плишкова кои уште пред неколку недели се откажаа од учество во Рио поради страв од вирусот „Зика“.