Лино Червар најави дека во пресрет на сезоната, која ќе биде веројатно најнапорна досега, на Металург ќе му бидат потребни барем уште две до три засилувања. Првото би можело да биде договорено до крајот на неделава.
Поранешниот капитен на српската јуниорска репрезентација, Немања Младеновиќ (22), ќе биде дел од Металург на турнирот во Кањижа и доколку ги исполни очекувањата, а биде задоволен и од понудата, тогаш би можело да дојде до соработка.
Иако има само 22 години, Младеновиќ веќе има меѓународна кариера во која се запишани настапи за Сесон Рен, Рошток, Гумерзбах и Веспрем.
Младеновиќ (1.94м, 94кг) како 16-годишен тинејџер дојде во Гумерзбах каде мина две години во академијата пред да биде прекомандуван во првиот тим. Важеше за голема надеж, но таму остана само една полусезона пред да биде објавено дека поради проблеми со дисциплината е „баниран“. Причините никогаш јавно не беа објавени, но сеедно, по ова накратко се пресели во второлигашот Рошток, а откако ја заврши сезоната од Германија замина во францускиот тим Сесон Рен на местото на Душко Челица, кој, пак, се пресели во ППД Загреб.
На северот на Франција одработе една сезона и по ова се раздели со Сесон и сега е пред потпис со македонскиот Металург.
Се работи за ракометар кој игра во два правца, посебно е добар во одбрана, што, секако, ќе му биде голем плус во очите на Лино Червар.
Металург од денеска до сабота ќе игра на српскиот турнир заедно со екипите на Партизан и БГК Мешков, додека во другата група се Нексе, Пик Сегед и Добруџа Суд. Како специјален гостин на турнирот е и репрезентацијата на С. Арабија.