Илија Абутовиќ ракометарот кој е неизоставен дел од одбраната на Вардар смета дека е дојдено време „црвено-црните“ да се пласираат на завршниот турнир во Лигата на шампионите.
- Мислам дека оваа е таа сезона кога требаме да направиме чекор напред. Созреавме како екипа и со засилувања би требало да се пласираме на „фајнал фор“. Во однос на лани сигурно ќе смениме нешто во одбраната, затоа што сме повисоки, и ќе имаме и повеќе ротации. Имаме повеќе нови играчи, па и Кањељас, Марсениќ, Рожерио кои можат да играат во средина каде сум и јас. Очекувам сега ќе ни биде и полесно. На подготовките работевме повеќе на нападот, зашто за тоа треба време за воигрување. Одбраната се работи повеќе и со желба, па затоа полесно е тука да се вклопат играчите, вели Илија Абутовиќ во интервјуто за клупскиот сајт.
Тој се осврнува и на настапот неодамна на турнирот во Брест, Белорусија каде Вардар го освои второто место зад домаќинот Мешков.
- Мешков е одлична екипа, нам ни недостасуваа тројца играчи, и немавме толку ротации. Тоа пресуди најмногу. Игравме три дена по ред без комплетен состав, а тие имаат две силни играчки постави. Сега ни доаѓаат во вторник во Скопје, па ќе имаме вистинска слика за силата на двете екипи.
Со натпреварот против Мешков на 30 август во Скопје се отвора новата натпреварувачка сезона за Вардар.