Григор Димитров стигна до второто коло на Ротердам опен, откако се врати од сет-негатива за 6:7(4)/6:2/6:4 победа над Германецот Миша Зверев за негова 15. победа во 2017 година. 25-годишниот бугарски тенисер сега има 15-1 скор и ќе се сретне со Денис Истомин, Узбекистанецот кој го победи Новак Ѓоковиќ во второто коло на Австралискиот опен.
Димитров победи под два часа, со 11 аса и со четири остварени брејк-топки од деветте шанси.
„Среќен сум со победата бидејќи Миша никогаш не е лесен противник“, вели Димитров, кој победи во Бризбејн и Софија, и стигна до полуфиналето на Австралискиот опен.
Во второто коло е и третиот носител, Белгиецот Давид Гофан по лесната 6:3/6:2 победа над Русинот Андреј Кузнецов.
„Се чувствувам навистина добро, а Андреј е одличен играч на индорс подлога. Имав одлична недела во Софија, каде што загубив од Димитров во финалето и сега сакам титула“, вели Гофан.