„Сон на секој ракометар е да игра во Бундеслигата, па и јас се надевам на тоа. Но во моментов сум играч на Металург и имам договор со него до 2020 година“, објаснува бекот.
Македонскиот репрезентативец и капитен на Металург, Филип Кузмановски, според ракометниот портал „24ракомет“, би требало да ги засили редовите на бундеслигашот Магдебург во сезоната 2018-2019. На почетокот од годинава, кога неговиот екс соиграч Филип Талески замина во Рајн Некар Левен, исто така и за него се најавуваше дека ќе замине во редовите на „лавовите“.
Дека Германија е посакувана дестинација за него, тој воопшто не крие, но демантира дека во моментов има каква било комбинација за заминување од редовите на Металург, клуб со кој има договор до 2020 година.
„Навистина не знам од каде дојде оваа информација. Сон на секој ракометар е да игра во Бундеслигата, која е една од најсилните и најквалитетни лиги во светот, па и јас се надевам на тоа. Претходно беше РНЛ, сега Магдебург, но нема никаков договор... Јас сум играч на Металург, со кој имам договор до 2020 година“, објаснува капитенот на „металурзите“, Филип Кузмановски.