„Да, да, остануваме заедно со Давид. Тој ќе биде мој асистент и следната сезона“, кусо потврди Раул Гонзалез
Тимот кој победува, не се менува! Раул Гонзалез како главен стратег и Давид Дејвис како негов асистент остануваат да го водат европскиот првак Вардар и во следната сезона.
На крајот од април годинава, се појавија информации дека Дејвис, кој има договор со македонскиот првак до јуни 2018, во новата сезона ќе ја загуби позицијата на помошник-тренер на Гонзалез и дека договорот ќе го доработи во Академијата.
Но, настаните што следуваа потоа, односно фантастичниот финиш на сезоната во која освоија сѐ што можеше да се освои, односно она најважното, шампионската титула во Лигата на шампионите, значеше дека нема да има промени на клупата на „црвено-црните“. Тоа ни го потврди и вардаровиот стратег.
„Да, да, остануваме заедно со Давид. Тој ќе биде мој асистент и следната сезона“, кусо потврди Раул Гонзалез.
Шпекулациите за „прекомандата“ на Дејвис го сместија и Парондо, асистентот на Раул во националниот тим на клупата на Вардар, но Парондо е дециден во својот став дека останува активен ракометар и по завршувањето на обврските со младинската репрезентација на СП У21 Алжир, ќе му се приклучи на унгарски Будакалаш во подготовките за новата сезона.
Давид Дејвис дојде во Вардар во 2014 година, и тоа по препорака токму од Раул Гонзалез. Покрај машкиот тим, на неговите услуги се потпираа и дамите, преклани како поддршка на тогашниот тренер Индира Кастратовиќ, додека лани дел од сезоната, и сам го водеше ЖРК Вардар. Но по негово барање, Дејвис се врати на клупата на машкиот тим до Раул, со кого го донесоа најголемиот успех не само на Вардар туку и на македонскиот клупски ракомет воопшто.