Рожер Федерер додаде нов рекорд во својата колекција во понеделникот кога ја започна 287. недела на првото место на АТП листата. Освојувачот на рекордни 17 грен слем титули се врати на првото место на машкиот тенис по двегодишно отсуство откако го совлада Британецот Енди Мареј во финалето на Вимблдон минатата недела.
|
Сампрас и Федерер се добри пријатели | |
Тоа беше седма титула на 30-годишниот Швајцарец на Ол Ингланд Клубот по што се осигура дека ќе го израмни и помине рекордот на американската легенда Пит Сампрас од 286 недели како светски број 1. Со седумте титули тој исто така се израмни со Сампрас и со Вилијам Реншоу со најголем број на титули од Ол Ингланд Клубот.
"Екстремно сум горд и почестен што го поминав рекордот на Пит, бидејќи тој беше мојот херој во детството и секогаш сум го сметал за мој идол. Поставив цел со мојот тим да се вратам на првото место на АТП листата, но со конкурентноста во тенисот во моментов не верував дека ќе бидам толку брз", вели Федерер, кој првпат беше број 1 во февруари 2004 година.
Сампрас освои 14 гренд слем титули во 14 години на АТП турнејата и имаше само пофални зборови за својот добар пријател Федерер.
"Најтешкото нешто да се направи во спортот е способноста да се остане на врвот. Рожер го направи тоа со фантастична игра", вели Американецот.
Сега кога речиси сите важни рекорди во тенисот му припаѓаат на Швајцарецот, во неговата колекција има една голема дупка - олимписко злато во сингл. Федерер беше олимпиец трипати - Сиднеј 2000, Атина 2004 и Пекинг 2008, но негов најдобар пласман е четвртото место во Сиднеј 2000. Во 2008 година тој не успеа да го мине четвртфиналето, каде што загуби од Американецот Џејмс Блејк. Сепак, утехата дојде во златото во двојки со Станислас Вавринка.
Сега, на неговата омилена подлога и на неговиот омилен турнир Вимблдон, тој има шанса да ја поправи и оваа "грешка". Тој веќе е во Лондон.