По пауза од повеќе од шест месеци во тимот се враќа Наумче Мојсоски, неговиот помлад брат не е повеќе дел од Металург
Двата елитни тима на Вардар ги кренаа котвите, а в недела тргнува и „сино-белата“ армада на Металург.
Амбициозниот машки тим и реновираната женска екипа в недела ќе ги почнат подготовките за претстојната сезона во која посебно кај мажите ќе има многу што да се види. Металург годинава одновно ќе игра групна фаза во Лигата на шампионите што меѓу другите одново ќе ги доведе во Скопје мега тимовите Кил и Пари Сен Жермен. Тука се и натпреварите од сè посилната СЕХА лига годинава збогатена со Веспрем за конечно финалето одново да биде пресметката за шампионската титула со Вардар во домашното првенство и националниот Куп.
Металург има реновиран состав, неколку имиња кои лани ги гледавме во сино-бело годинава ќе играат за други екипи. Мијатовиќ, Пецаковски, Кеџо, Мандиќ, Златко Мојсоски.
За тимот од „Автокоманда“ ќе дебитираат Липовина, Кукоски, Ѓукиќ и во исчекување сме на потврда за тоа кој ќе биде новиот играч на линијата.
Сепак, најголемото засилување за Металург во однос на ланската полусезона не доаѓа од друг клуб туку од постојниот играчки кадар.
По повеќе од шест месеци пауза во игра се враќа првата ѕвезда на тимот, Наумче Мојсоски. Тој минатиот декември скина лигаменти на коленото, се оперираше, рехабилитираше и сега одново ќе биде на терен.
„Целосно сум рехабилитиран и почнувам со тренинзи со екипата од прв ден“, вели Мојсоски.
Сепак, паузата беше долга, па враќањето мора да биде внимателно. Од тие причини, најверојатно нема да биде во составот што ќе го брани пехарот на струшкиот турнир.
„Не се работи за тоа дали можам, но мораме да бидеме внимателни. Тоа ќе бидат први натпревари за мене по повеќе од пола година пауза и најмногу поради подлогата сакам да го избегнам тој ризик. Ништо не е дефинитивно решено, но најверојатно ќе го пропуштам турнирот во Струга“, вели централниот бек на Металург.