Постои мала шанса Словенецот да ја „истурка“ сезоната без операција, но и понатаму сè е под прашалник
Едно е сигурно, Матјаж Брумен нема да биде во составот на Вардар за натпреварот со Веспрем, в сабота, во СЦ „Јане Сандански“. А, дали така ќе биде и во следните месеци до крајот на сезонава, и понатаму е под знак прашалник. Вчера десното крило на Вардар нè информираше дека постои мала шанса да ја заврши сезоната пред да му биде извршена хируршка интервенција на десното рамо, но и понатаму конкретен одговор нема.
Лекарскиот тим на Вардар ја надгледува ситуацијата и чека конечен одговор од словенечки специјалист, кој треба да потврди дали веднаш ќе се оди со операција, или, пак, со терапии ќе се контролира повредата на рамото за да може Брумен да ја доврши сезоната.
Повредата не е на шутерското рамо на ракометарот туку на десната рака, најверојатно добиена при тренинг дуел, која сега создава нестабилност и проблем за крилото да може да игра и функционира непречено.