Фенербахче ја совлада Цедевита со 86:73. Антиќ беше во почетната петорка, даде 8 поени, сите во првото полувреме, но на пет минути до крајот на средбата почувствува болка во ногата и веќе не се врати на терен.
И загрепска Цедевита се запиша на списокот на екипи кои беа надиграни од Фенербахче во Топ 16 фазата од Евролигата, но истанбулскиот тим можеби и скапо ќе ја плати оваа тешка победа која беше извојувана благодарение на добрата игра во последната четвртина. Македонскиот интернационалец Перо Антиќ беше во почетната петорка на Фенербахче, даде 8 поени, сите во првото полувреме, но на пет минути до крајот на средбата почувствува болка во ногата и веќе не се врати на терен. Во финишот на мечот се повреди и Гркот Костас Слукас. Ако повредите на Антиќ и Слукас се сериозни, тоа може да биде голем проблем за клубот кој има амбиција да стане првиот турски што ја освоил Евролигата. Поранешниот капитен на македонскиот национален тим играше 23 минути, а покрај осумте поени, имаше и два скока. Фенербахче е единствениот тим во Топ 16 кој нема пораз и се наоѓа на добар пат да влезе во четвртфинале и како првопласиран од групата да ја има предноста на домашниот терен во нокаут фазата.