Македонската кошаркарска репрезентација само два дена по завршувањето на турнирот „Трофеј Македонија“, продолжува со одигрување на пријателски средби во рамките на подготовките за настап на квалификациите за пласман на Евробаскетот 2017. „Црвено-жолтите“ од денес до четврток на гости во Марибор ќе одиграат три пријателски средби (две отворени и еден затворен меч за јавноста) против репрезентацијата на Словенија.
Селекторот Драган Раца на располагање ќе ги има сите 13 кошаркари кои повеќе од еден месец се на подготовки. Тоа значи дека на дуелите со Словенија ќе настапи и нашиот највисок кошаркар Марко Дујковиќ (226 см.) кој поради дисторзија на скочниот зглоб ги пропушти дуелите на Трофејот Македонија.
Првиот меч против Словенија нашиот национален тим ќе го одигра вечерва од 21 часот во салата Табор во Марибор.
Утре македонските кошаркари ќе одработат и еден тренинг претпладне, а вечерта од 19 часот ќе одиграат и затворен меч за јавност против домашната селекција на Словенија.
Во среда Македонија и Словенија ќе одиграат уште еден пријателски натпревар од 21 часот, кој директно ќе биде пренесуван на националната телевизија на Словенија.
За македонските кошаркари дуелите со Словенија ќе бидат последните контролни средби пред стартниот натпревар против Луксембург во квалификациите за пласман на Европското првенство.