Македонската селекција за кошаркари до 18 години, со изненадувачки високата победа над Швајцарија од 84:61, обезбеди место во разигрувањето за 9-16 место на Европското првенство Б дивизија кое се игра во Талин, Естонија. После првите два порази, сега Македонија врза две победи по ред и избегна битка за опстанок во Б дивизија.
Македонија со одлична игра во второто полувреме, убедливо ги победи швајцарските јуниори, најверојатно доволно за освојување на третото место во групата, бидејќи „црвено-жолтите“ се најдобри во групата од три тима кои првиот дел од шампионатот би требало да го завршат со биланс 2-3, доколку не се случи некоја сензација во последната рунда, закажана за утре. Загубивме со четири поени разлика од Данска, Данците пак минимално со 53:54 беа поразени од Швајцарија, па затоа денеска на нашите им требаше победа од барем 5 поени разлика за да бидеме најдобри во тој круг од три селекции.
Најистакнати во тимот на селекторот Ѓорѓи Кочов беа Дамјан Крстевски (22 поени и 14 скока), Андреј Јордановски (17 поени и 6 асистенции), Лука Стојановски (18 поени и 5 скока) и Павле Михајлоски (13 поени и 4 скока).
Утре од 17.15 часот, Македонија се среќава со домаќинот Естонија, кој засега не знае за пораз и во втората фаза продолжува во битка за влез во А дивизија. Потоа следува еден слободен ден, па разигрување за 9-16 место.