На навивачите на МЗТ Скопје Аеродром не им е пријатен поразот од Работнички ниту на таков меч како во петокот кој ништо не одлучуваше за домашните, но тренерот Алеш Пипан смета оти тоа било само моментно опуштање, и во плеј-офот работите ќе бидат поинакви.
„Поразот од Работнички не е страшен. Сакавме да победиме, далеку од тоа дека не сакавме, но направивме премногу грешки и игравме слаба одбрана, посебно во првиот дел. Исто така клучен беше и слабиот пристап. Нема да биде така кога ќе се игра полуфиналето. Тоа ќе биде друга приказна. Фени Индустри е сериозен тим, против кој ако сакаме да победиме, ќе треба максимално одговорно да се пристапи кон дуелот“ - рече Пипан.
На дербито во петокот на трибините имаше само околу 500 луѓе, од кои речиси пола беа за гостинскиот тим. На претходната пресметка на овие два тима во новиот „Јане Сандански“, играна во февруари (тогаш прв тренер на МЗТ беше Александар Јончевски), се собраа 4.000 луѓе, бројка која доликува на пресметка на двата најтрофејни клуба во Македонија и екипи со најбогата традиција на меѓусебни дуели во екипните спортови кај нас. Словенечкиот стручњак не одговори директно на прашањето дали на тимот му недостасува поддршка од трибините.
„Јас дојдов подоцна, не знам точно што се случувало и што е проблемот“ - рече Пипан.
За Пипан не е добро што МЗТ ќе има една недела време за подготвување за полуфиналето, бидејќи тој паузата не ја гледа како одмор туку губење ритам.
„Цела недела ќе го чекаме следниот меч. По третпат сезонава ни се случува седум дена само да тренираме. Тоа негативно влијае на играчите, се губи натпреварувачкиот ритам“ - смета тренерот на „штрковите“.