Вистински хит по првите две кола е белорускиот БАТЕ Борисов. Оваа екипа покажа дека не е случајна нивната победа над Лил минатото коло. Одличната одбрана и снаодливоста во нападот беа причините за победата и над големиот Баерн на домашен терен. Неверојатни 3:1 стоеа на семафорот на стадионот во Минск.
Водечкиот гол за БАТЕ го постигна Александар Павлов на асистенција на Володко во 23 минута. Во второто полувреме прекрасна акција одработија Белорусите, а топката стигна до капитенот Ортиконов кој од пет метри без проблем го совлада Нојер. Баерн даде гол и тоа во последната минута преку Рибери меѓутоа надежта комплетно им ја "угаси" Ренан во третата минута од продолжението кога постигна гол за триумф на БАТЕ со 3:1.
Белорускиот шампион продолжи со изненадувањата во елитното фудбалско натпреварување. До лани немаше победа во Лигата на шампионите, а сега нанижа две по ред. Баерн ја прекина серијата од девет победи по ред во сите конкуренции. За вчерашниот кикс ќе мора да се "вади" против Лил следното коло.