„Сите се во опција за Барселона“, е последната информација која доаѓа од таборот на македонскиот првак Вардар. Главниот дефанзивец Илија Абутовиќ, кој го пропушти првиот натпревар, Стојанче Стоилов, кој месец дена паузираше поради повреда на рамото, исто така е назад во тимот, како и Петар Ангелов, голманот кој поради дисторзија на скочниот зглоб ги пропушти последните два натпревари на екипата. Сите се во полн тренажен процес и стандардно се подготвуваат со другите соиграчи за реванш натпреварот со европскиот првак Барселона, закажан за в недела, во „Јане Сандански“.
Лекарскиот тим успеа експресно да го рехабилитира Абутовиќ и да го стави во ред проблемот со повредата на рамото. Стоилов претходно беше најавено дека ќе се врати за Киелце, но се чини дека кружниот напаѓач е веќе доволно подготвен да биде во игра и оваа недела. Две информации, кои и тоа како се важни, особено за одбранбената линија на нашиот шампион.
Тоа значи дека со исклучок на Александар Деверен, кој до крајот на сезоната е надвор од игра, шпанскиот стратег на Вардаровата клупа Раул Гонзалез може мирно да работи на тактиката која ќе му донесе позитивен резултат во новата средба со бранителот на титулата во ЛШ, со оглед на тоа дека на располагање ги има сите играчи. На него ќе остане само онаа „слатка мака“ да одлучи на кои играчи ќе им ја даде довербата и кои 16-мина ќе истрчаат на теренот викендов.